Author: Nikhil Gopalakrishnan

റിട്ടയർമെമെൻറ് പ്ലാനിംഗ്

ജീവിത സായാഹ്നത്തിലേയ്ക്ക് പണം കരുതി വെയ്ക്കുക എന്നത് സ്വന്തമായി സമ്പാദിയ്ക്കാൻ തുടങ്ങുമ്പോഴേ നമ്മളിൽ പലരും ചെയ്യുന്ന കാര്യമാണ്. കാരണം മറ്റൊന്നുമല്ല, ബുദ്ധിപൂർവ്വമായ നിക്ഷേപങ്ങൾ ആണ് സാമ്പത്തിക ഭദ്രത നിറഞ്ഞ ഒരു വിരമിയ്ക്കൽ ജീവിതത്തിലേക്കുള്ള ആദ്യ പടി എന്നത് കൊണ്ട് തന്നെ. നിക്ഷേപിയ്ക്കുമ്പോൾ ഒരൊറ്റ ഉല്പ്പന്നത്തിൽ മാത്രമായി നിക്ഷേപിയ്ക്കാതിരിയ്ക്കുക, റിട്ടയർമെന്റിന് മാത്രമായി ഒരു പോർട്ട്ഫോളിയോ സൃഷ്ടിയ്ക്കുക തുടങ്ങിയവയും ശ്രദ്ധിയ്ക്കണം. അതിന് വിരമിയ്ക്കുന്ന പ്രായം, ദിവസം എന്നിവയിലെല്ലാം വ്യക്തത വേണം. ഇത് കൂടാതെ വിരമിയ്ക്കലിന് ശേഷവും തുടരാൻ സാദ്ധ്യതയുള്ള സാമ്പത്തിക ഉത്തരവാദിത്വങ്ങളെ കുറിച്ച് ധാരണ ഉണ്ടാകണം. നിങ്ങളാണ് കുടുംബത്തിൽ പണം സമ്പാദിയ്ക്കുന്നയാളെങ്കിൽ, നിങ്ങളുടെ മരണശേഷമോ അസാന്നിദ്ധ്യത്തിലോ നിങ്ങളുടെ പങ്കാളിയ്ക്ക് സാമ്പത്തിക ബുദ്ധിമുട്ടുകൾ ഉണ്ടാകില്ലെന്ന് ഉറപ്പ് വരുത്തണം. നിങ്ങളുടെ ഓരോ നിക്ഷേപത്തിനും നോമിനിയെ നിശ്ചയിയ്ക്കുക, ഒരു വിൽപത്രം തയ്യാറാക്കുക തുടങ്ങിയവ ചെയ്യുന്നത് നിങ്ങളുടെ സാമ്പത്തിക ഇടപാടുകളിൽ സുതാര്യത ഉറപ്പ് വരുത്തും. ഒരു വിദഗ്ദ്ധൻറെ സഹായം തേടിയാൽ ഈ നടപടി ക്രമങ്ങളെല്ലാം ഒരുമിച്ച് ചെയ്യേണ്ടതിൻറെ ബുദ്ധിമുട്ട് ഒഴിവാക്കാം. താഴെ പറഞ്ഞ കാര്യങ്ങൾ പോർട്ട്ഫോളിയോയിൽ ഉൾപ്പെടുത്തി വിരമിയ്ക്കൽ സന്തോഷകരമാക്കൂ

ഹെൽത്ത് ഇൻഷുറൻസ്

വാർധക്യത്തിൽ അസുഖങ്ങൾ വരാൻ എളുപ്പമാണ്. അത് കൊണ്ട് വിരമിയ്ക്കൽ മുന്നിൽ കണ്ട് നേരത്തെ തന്നെ നിങ്ങൾക്ക് ഒരു ഹെൽത്ത് ഇൻഷുറൻസ് എടുക്കേണ്ടത് അത്യാവശ്യമാണ്. വിരമിയ്ക്കുന്നതിന് ശേഷം പുതിയ ഒരു പോളിസി എടുക്കുന്നത് എളുപ്പമാവില്ല. അതിനാൽ തന്നെ നേരത്തെ ഉചിതമായ ഒരെണ്ണം ഉണ്ടാകുന്നത് ഏറെ ഗുണം ചെയ്യും.

എമർജൻസി ഫണ്ട്

എളുപ്പത്തിൽ എടുക്കാവുന്ന തരത്തിൽ ഒരു എമർജൻസി ഫണ്ട് ഉണ്ടാകണം. അത് സേവിങ്സ് അക്കൗണ്ടിൻറെ രൂപത്തിലോ എളുപ്പത്തിൽ പിൻവലിയ്ക്കാവുന്ന മ്യൂച്ച്വൽ ഫണ്ടിൻറെ രൂപത്തിലോ ആവാം. 12 മാസത്തേക്കുള്ള നിങ്ങളുടെ മാസച്ചിലവ് ആകണം എമർജൻസി ഫണ്ട്.

പ്രൊവിഡൻറ് ഫണ്ട് അഥവാ നാഷണൽ പെൻഷൻ സ്‌കീം

പ്രൊവിഡൻറ് ഫണ്ടിലോ നാഷണൽ പെൻഷൻ സ്‌കീമിലോ ഒരു അക്കൗണ്ട് തുറക്കുക. ഈ ഫണ്ട് റിട്ടയർമെന്റിന് പ്രത്യേകമായി മാറ്റി വെയ്ക്കുക.

ഡെബ്റ്റും ഇക്വിറ്റിയും ചേർന്ന ഒരു സംതുലിതമായ പോർട്ട്ഫോളിയോ

റിട്ടയർമെന്റ് ഫണ്ടിലെ ഇക്വിറ്റി നിക്ഷേപം കഴിയുന്നതും കുറയ്ക്കണം. അത് വേഗത്തിൽ എടുക്കാൻ പാകത്തിലുള്ള നിക്ഷേപതിന്റെ രൂപത്തിൽ ആക്കണം. 75 ശതമാനം ഫണ്ട് ഡെബ്റ്റ് ലും ബാക്കി 25 ശതമാനം ഇക്വിറ്റിയിലും നിക്ഷേപിയ്ക്കുക. ഇങ്ങിനെ ചെയ്താൽ വിപണിയിലുണ്ടാകുന്ന കയറ്റിറക്കങ്ങൾ നിക്ഷേപത്തെ ബാധിയ്ക്കില്ല. എന്നാൽ വിരമിയ്ക്കലിന് ശേഷമുള്ള ആവശ്യങ്ങൾക്ക് നിങ്ങളുടെ കൈയിലുള്ള 50 ശതമാനം ഫണ്ട് കൊണ്ട് കഴിയുമെങ്കിൽ ബാക്കി ഇക്വിറ്റിയിൽ നിക്ഷേപിയ്ക്കുക. ഡെബ്റ്റ് ലെ നിക്ഷേപം സ്ഥിരതയുള്ള ഒരു ആദായം ഉറപ്പ് വരുത്തുമെങ്കിൽ ഇക്വിറ്റി ധന സമ്പാദനത്തിന് സഹായിയ്ക്കും.

എൻ സി ഡി (നോൺ കോൺവെർട്ടിബിൾ ഡിബഞ്ചർസ്) അല്ലെങ്കിൽ ഡെബ്റ്റ്

എൻ സി ഡി യിൽ നിക്ഷേപിയ്ക്കുന്നത് ഒരു നിശ്ചിത നിരക്കിൽ ആദായം ലഭിയ്ക്കുന്നത് ഉറപ്പ് വരുത്തും. ഇത് മികച്ച ഒരു വരുമാന മാർഗ്ഗമാണ്.

ഡയറക്ട് ഇക്വിറ്റി

ഡയറക്ട് ഇക്വിറ്റിയിൽ നിക്ഷേപിച്ചാൽ 1% അല്ലെങ്കിൽ 2 % എന്ന നിരക്കിൽ ഡിവിഡൻറ് ലഭിയ്ക്കും. ഇന്നത്തെ സാഹചര്യം കണക്കിലെടുത്താൽ ഒരു വാടക വീടിൽ നിന്ന് നിങ്ങൾക്ക് ലഭിയ്ക്കുന്ന ആദായം 2 ശതമാനത്തിൽ താഴെയാണ്. അതിനാൽ വിരമിയ്ക്കൽ കണക്കിലെടുത്ത് മികച്ച സ്ഥാപനങ്ങളുടെ ഓഹരികൾ നേരത്തെ വാങ്ങിയാൽ വിരമിയ്ക്കാറാകുമ്പോഴേക്കും മികച്ച യു ഒരു തുക ലഭിയ്ക്കും.

റിയൽ എസ്റ്റേറ്റ് – വാടക വരുമാനം

നാണയപ്പെരുപം വർദ്ധിച്ചാലും കാര്യമായി ബാധിയ്ക്കാത്തതാണ് വാടക വീടിൽ നിന്നുള്ള വരുമാനം. അതിന് കാരണം നാണയപ്പെരുപ്പം വാടക കൂട്ടാൻ തടസ്സമാകില്ല എന്നതാണ്. ഇത് സുസ്ഥിരമായ ഒരു ആദായം ഉറപ്പ് വരുത്തുന്നു.

ആന്വിറ്റി

7 അല്ലെങ്കിൽ 10 വർഷം ഒരു തുക അടയ്ക്കുകയും അതിന് ശേഷം പെൻഷൻ പോലെ മാസം തോറും ആദായം ലഭിയ്ക്കുകയും ചെയ്യുന്നതാണ് ആന്വിറ്റി. വിരമിയ്ക്കൽ ലക്ഷ്യമിട്ട് നിക്ഷേപിയ്ക്കുന്നവർക്ക് ഏറെ യോജിച്ചതാണ് ഇത്. മികച്ച ആന്വിറ്റി ഉൽപ്പന്നങ്ങൾ നൽകുന്ന സ്വകാര്യ സ്ഥാപനങ്ങൾ ഏറെയുണ്ട്.

ഹോബി

നിങ്ങളുടെ മനസ്സിനിണങ്ങിയ ഏതെങ്കിലും പ്രവൃത്തികളിൽ ഏർപ്പെടുക. ഇത് നിങ്ങളെ ഉത്തേജിപ്പിയ്ക്കുക മാത്രമല്ല ചെയ്യുന്നത് അതിൽ നിന്ന് വരുമാനം ഉണ്ടാക്കാൻ കഴിയുകയും ചെയ്യും.

വിരമിയ്ക്കൽ ജീവിതത്തിന് നേരത്തെ ഒരുങ്ങുന്നവരുടെ പൊതുവായ പോർട്ട്ഫോളിയോ ഇതായിരിയ്ക്കണം. സ്ഥിരമായ ആദായവും അതോടൊപ്പം ധന സമ്പാദനവും ഉറപ്പ് വരുത്തുന്ന രീതിയിൽ നിക്ഷേപം വിനിയോഗിയ്ക്കുക.

ഡെബ്റ്റോ ബോണ്ടോ

നിക്ഷേപങ്ങൾ തിരഞ്ഞെടുക്കുക പലപ്പോഴും ബുദ്ധിമുട്ടേറിയ ഒരു പരിപാടി ആണ്. ഒരു ചെറിയ തെറ്റ് മതി പരാജയങ്ങൾക്ക് കരണമാവാൻ. അത് കൊണ്ട് തന്നെ വിവിധ നിക്ഷേപ സാദ്ധ്യതകളെ കുറിച്ചും അവയുടെ ഗുണങ്ങളെ കുറിച്ചും വ്യക്തമായി മനസ്സിലാക്കേണ്ടതുണ്ട്. ആളുകൾക്കിടയിൽ മ്യൂച്ച്വൽ ഫണ്ടുകളെ കുറിച്ച് ഏറെ അവബോധം ഇന്നുണ്ട്. എന്നാൽ നിങ്ങളുടെ മ്യൂച്ച്വൽ ഫണ്ട് നിക്ഷേപങ്ങൾ ഇക്വിറ്റിയിലാണോ ഡിബഞ്ചറിലാണോ നിക്ഷേപിയ്ക്കുന്നത് എന്ന് എത്ര പേർക്കറിയാം. ഇവിടെ നമ്മൾ സംസാരിയ്ക്കാൻ പോകുന്നത് ഡിബഞ്ചറിനെ കുറിച്ചും ഇക്വിറ്റിയിൽ നിന്ന് അതിനുള്ള വ്യത്യാസത്തെ കുറിച്ചുമാണ്.

ഇക്വിറ്റിയും ഡിബഞ്ചറും

ഗവണ്മെന്റ് ആയാലും കോർപ്പറേറ്റ് സ്ഥാപനങ്ങൾ ആയാലും രണ്ട് രീതിയിലാണ് നിക്ഷേപങ്ങൾക്ക് സ്രോതസ്സ് കണ്ടെത്തുന്നത്. ഇതിലെ ആദ്യത്തെ രീതി ഇക്വിറ്റി ആണ്. ഇതിൽ സ്ഥാപനത്തിൻറെ ഉടമസ്ഥാവകാശം ഷെയറിലൂടെ നിക്ഷേപകർക്ക് കൈമാറുന്നു. ഇതിൻറെ അനന്തര ഫലം എന്തെന്നാൽ സ്ഥാപനം നഷ്ടത്തിലായാൽ നിക്ഷേപകർക്ക് നഷ്ടം സംഭവിയ്ക്കുന്നു. മറിച്ച്‌ സ്ഥാപനം ലാഭത്തിലായാൽ നിക്ഷേപകന് ലാഭം ഉണ്ടാകുന്നു. രണ്ടാമത്തെ രീതി ഡിബഞ്ചർ ആണ്. നേരത്തെ നിശ്ചയിച്ച നിരക്കിൽ ഡിബഞ്ചർ അഥവാ കടപ്പത്രങ്ങൾ നൽകുക. ഈ നിരക്കിന് കൂപ്പൺ എന്ന് പറയുന്നു. ഉദാഹരണത്തിന് ഒരു നിക്ഷേപകൻ 10 ശതമാനം നിരക്കിൽ സ്ഥാപനത്തിൽ നിന്ന് ഡിബഞ്ചർ വാങ്ങിയെന്ന് വെയ്ക്കുക. സ്ഥാപനം നഷ്ടത്തിലാണെങ്കിലും ലാഭത്തിലാണെങ്കിലും വർഷം 10 ശതമാനം നിരക്കിൽ നിക്ഷേപകന് പലിശ നല്കാൻ സ്ഥാപനത്തിന് ബാധ്യത ഉണ്ട്. ഇക്വിറ്റിയിൽ സ്ഥാപനത്തിൻറെ ഉടമസ്ഥാവകാശം നിക്ഷേപകരിൽ ആണെങ്കിൽ ഡിബഞ്ചറിൽ നേരത്തെ നിശ്ചയിച്ച പലിശ നിരക്കിൽ കടപ്പത്രം നൽകുന്നു. ഇക്വിറ്റിയിൽ ലാഭനഷ്ടങ്ങൾ ഒരു പോലെ സഹിയ്ക്കാൻ നിക്ഷേപകർക്ക് ബാധ്യത ഉണ്ടെങ്കിൽ ഡിബഞ്ചറിൽ നിക്ഷേപകന് നിശ്ചിത നിരക്കിൽ ആദായം ലഭിയ്ക്കും. സ്ഥാപനം ലാഭത്തിലോ നഷ്ടത്തിലോ എന്നത് ഈ ആദായത്തെ ബാധിയ്ക്കില്ല.

ഡിബഞ്ചർ റേറ്റിംഗ്

ഒരു ഡിബഞ്ചറിൽ നിക്ഷേപിയ്ക്കണോ വേണ്ടയോ എന്ന് മനസ്സിലാക്കുന്നത് എങ്ങിനെ എന്നത് പലരെയും കുഴയ്ക്കുന്ന ചോദ്യമാണ്. എല്ലാ ഡിബഞ്ചറിനും റേറ്റിംഗ് ഏജൻസി ഒരു റേറ്റിങ് നല്കും. ഈ റേറ്റിംഗ് നല്കുന്നത് സ്ഥാപനത്തിൻറെ കടം തിരിച്ചടക്കാനുള്ള പ്രാപ്തിയുടെയും ജനപ്രീതിയുടെയും അടിസ്ഥാനത്തിലാണ്. നല്ല റേറ്റിംഗ് ഉള്ളതും വിശ്വസനീയവുമായ ഡിബഞ്ചറിൽ നിക്ഷേപിയ്ക്കുക.

റിസ്ക് സാധ്യത

ഇക്വിറ്റിയായാലും ഡിബഞ്ചറിലായാലും റിസ്ക് സാദ്ധ്യതയുണ്ട്. സ്ഥാപനം ലാഭത്തിലാണെങ്കിൽ ഇക്വിറ്റി ഹോൾഡർ നേട്ടമുണ്ടാകും, മറിച്ച്‌ നഷ്ടം വന്നാൽ സഹിയ്ക്കാനും ബാദ്ധ്യസ്ഥരാണ്. ലാഭമായാലും നഷ്ടമായാലും ഇക്വിറ്റിയിൽ പരിധിയില്ല. ഡിബഞ്ചറിൽ സ്ഥാപനം നഷ്ടത്തിലായാലും ലാഭത്തിലായാലും പലിശ നല്കാൻ ബാദ്ധ്യസ്ഥരാണ് സ്ഥാപനം. കൃത്യമായി ഒരു വരുമാനം ആഗ്രഹിയ്ക്കുന്നവർക്ക് ഡിബഞ്ചറാണ് നല്ലത്.

ഓർത്തിരിയ്‌ക്കേണ്ടത്:

• നല്ല റേറ്റിംഗ് ഉള്ളതും വിശ്വസിക്കത്തക്കതുമായ ഡിബഞ്ചറിൽ നിക്ഷേപിയ്ക്കുക.
• സ്ഥാപനത്തിന് കടം വീട്ടാൻ കഴിഞ്ഞില്ലെങ്കിൽ, നിക്ഷേപകൻ നഷ്ടത്തിലാകും. സുരക്ഷിതമായ ഗവണ്മെന്റ് ബോണ്ടുകൾ തിരഞ്ഞെടുക്കുന്നത് നല്ലതാണ്.
• നല്ല മ്യൂച്ച്വൽ ഫണ്ടുകളിൽ നിക്ഷേപിയ്ക്കുന്നത് നല്ല ആദായം ഉറപ്പാക്കും.

ഇക്വിറ്റി ആയാലും ഡിബഞ്ചർ ആയാലും നിക്ഷേപങ്ങളിൽ എന്നും റിസ്ക് സാദ്ധ്യത ഉണ്ട്. രണ്ടിന്റെയും ഗുണവും ദോഷവും വ്യക്തമായി മനസ്സിലാക്കുന്നത് ഉചിതമായ ഒരു തീരുമാനം എടുക്കാൻ നിക്ഷേപകരെ സഹായിയ്ക്കും.

എന്താണ് ഇൻഷുറൻസ്

ഒരു മനുഷ്യൻറെ ജീവിതം, മരണം, ശാരീരിക വൈകല്യങ്ങൾ, മറ്റ് അപകടങ്ങൾ എന്നിവ മൂലം ഏറെ അനിശ്ചിതത്വം നിറഞ്ഞതാണ്. ഈ അപകട സാദ്ധ്യത അഥവാ റിസ്ക് ഒരു സ്ഥാപനത്തിന് കൈമാറ്റം ചെയ്യുന്നതിനെയാണ് ഇൻഷുറൻസ് എന്ന് പറയുന്നത്. ഇൻഷുറൻസിനെ ഒരു നിക്ഷേപമായി കാണുന്ന ആളുകളുണ്ട്, അത് ശരിയല്ല. പോളിസി എടുത്തയാളുടെ ആകസ്മിക മരണം, അല്ലെങ്കിൽ അയാളുടെ സ്ഥാവരജംഗമ വസ്തുക്കൾക്ക് സംഭവിയ്ക്കുന്ന നാശം എന്നിവയ്‌ക്കെതിരെ ഉള്ള ഒരു സംരക്ഷണം ആണ് ഇൻഷുറൻസ്. നിങ്ങൾ അടയ്ക്കുന്ന പ്രീമിയം തുകയ്ക്കനുസരിച്ച്‌ ജീവനോ സ്വത്തിനോ ഉണ്ടാകുന്ന നാശം വഹിയ്ക്കാൻ ഇൻഷുറൻസ് സ്ഥാപനം തയ്യാറാകുന്നു. ആകസ്മികമായി സംഭവിയ്ക്കുന്ന അപകടം മൂലം കുടുംബം അനുഭവിയ്ക്കുന്ന സാമ്പത്തിക ബുദ്ധിമുട്ടുകളിൽ നിന്ന് കര കയറാൻ സഹായിയ്ക്കുക എന്നതാണ് ഇൻഷുറൻസ് കൊണ്ടുള്ള പ്രധാന ഉദ്ദേശം.

മുകളിൽ പറഞ്ഞ ഉദ്ദേശത്തെ സാധൂകരിയ്ക്കാൻ, മോട്ടോർ ഇൻഷുറൻസ് ഉദാഹരണമായി എടുക്കാം. ഒരു അപകടത്തിൻറെ ഫലമായി നിങ്ങളുടെ വാഹനത്തിന് സംഭവിയ്ക്കുന്ന കേടുപാടുകൾ നിങ്ങളിൽ ഉണ്ടാക്കുന്ന സാമ്പത്തിക ബാധ്യത ഇല്ലാതാക്കുക എന്നതാണ് മോട്ടോർ ഇൻഷുറസിൻറെ ലക്‌ഷ്യം. മോട്ടോർ ഇൻഷുറൻസ് നിങ്ങളുടെ വാഹനത്തിന് സാമ്പത്തിക സുരക്ഷിതത്വം നല്കുന്നു. വാഹനാപകടം നടക്കുമ്പോൾ വാഹനം നന്നാക്കാനാവശ്യമായ പണം നല്കാൻ ഇൻഷുറൻസ് സ്ഥാപനം ബാദ്ധ്യസ്ഥരാണ്. ലൈഫ് ഇൻഷുറൻസിലും ഇത് തന്നെ സ്ഥിതി.

ഒരാൾ ലൈഫ് ഇൻഷുറൻസ്, മെഡിക്കൽ ഇൻഷുറൻസ് എന്നിവ എടുക്കേണ്ടത് അത്യാവശ്യമാണ്.

ലൈഫ് ഇൻഷുറൻസ്

ലൈഫ് ഇൻഷുറൻസിൽ മനുഷ്യജീവനാണ് ഇൻഷുർ ചെയ്തിരിയ്ക്കുന്നത്. പോളിസി എടുത്തയാൾക്ക് എന്തെങ്കിലും അപകടമുണ്ടായാൽ, അപകടം നേരിട്ട കുടുംബത്തിന് ഒരു വലിയ തുക ഇൻഷുറൻസായി ലഭിയ്ക്കും. ഇത് പെട്ടെന്നുണ്ടാകുന്ന സാമ്പത്തിക ബുദ്ധിമുട്ടുകൾ തരണം ചെയ്യാൻ അവരെ സഹായിയ്ക്കും. ഉദാഹരണത്തിന് ഒരു കുടുംബത്തിൻറെ ഏക വരുമാന മാർഗ്ഗമായ ഒരാൾക്ക് മരണം സംഭവിച്ചു എന്ന് കരുതുക, ആ കുടുംബത്തിന് അടിയന്തിരമായി പണം ആവശ്യം വന്നാൽ ഈ ഇൻഷുറൻസ് തുക അവരെ സഹായിയ്ക്കും.

മെഡിക്കൽ എമർജൻസി

ഒരാളുടെ വൈദ്യശാസ്ത്രപരമായ അടിയന്തിര ഘട്ടങ്ങളെ തരണം ചെയ്യാൻ സഹായിയ്ക്കുന്നതാണ് മെഡിക്കൽ ഇൻഷുറൻസ്. ഇത്തരം ഘട്ടങ്ങളിൽ പ്രീമിയം തുകയ്ക്കനുസരിച്ച്‌ പോളിസി എടുത്തയാളുടെ ചികിത്സയ്ക്ക് ആവശ്യമായ പണം ഇൻഷുറൻസ് സ്ഥാപനം നല്കുന്നു.

മുകളിൽ പറഞ്ഞത് പോലെ ഒരു മനുഷ്യൻറെ ജീവനും സ്വത്തിനും ലഭിയ്ക്കുന്ന സംരക്ഷണം ആണ് ഇൻഷുറൻസ്. എന്നാൽ നികുതി ആസൂത്രണത്തിൻറെ ഭാഗമായാണ് മിക്ക ആളുകളും ഇൻഷുറൻസ് പോളിസി എടുക്കുന്നത്. മതിയായ പഠനമോ തയ്യാറെടുപ്പുകളോ ഇല്ലാതെ പലരും തങ്ങൾക്ക് അനുയോജ്യമല്ലാത്ത പോളിസികളിൽ ചേരുന്നു. ഒരു പോളിസി എടുക്കുന്നതിന് മുമ്പ് തങ്ങളുടെ ജീവിതത്തിലെ അപകട സാദ്ധ്യതകൾ അഥവാ റിസ്ക് ആളുകൾ തിരിച്ചറിയണം. അവ കൃത്യമായി വിലയിരുത്തി അതിനനുസൃതമായി വേണം ഇൻഷുറൻസ് എടുക്കേണ്ടത്. എങ്കിലേ ഇൻഷുറൻസ് എന്ന പ്രക്രിയ കൊണ്ടുള്ള ലക്‌ഷ്യം പൂർണമാകൂ.

എന്താണ് ഇക്വിറ്റി

ഇന്ന് ഏറെ ആളുകൾ തിരഞ്ഞെടുക്കുന്ന ഒന്നാണ് മ്യൂച്ച്വൽ ഫണ്ട് നിക്ഷേപങ്ങൾ. പരസ്യങ്ങളിലൂടെയും മറ്റും മ്യൂച്ച്വൽ ഫണ്ട് നിക്ഷേപങ്ങളെ കുറിച്ച് ആളുകളിൽ ഏറെ അവബോധമുണ്ട്. എന്നാൽ ഇതിൽ വലിയൊരു ഭാഗം ഇക്വിറ്റിയിലാണ് നിക്ഷേപിയ്ക്കുന്നത് എന്ന് എത്ര പേർക്കറിയാം. ഇത് ഇക്വിറ്റിയെ കുറിച്ച് കൃത്യമായ ഒരു അവബോധം ആളുകളിൽ ഉണ്ടാക്കേണ്ടതിന്റെ ആവശ്യകത ആണ് കാണിയ്ക്കുന്നത്. ഇക്വിറ്റിയിൽ നിക്ഷേപിയ്ക്കുന്നവർക്ക് പോലും ഒരു ഉല്പന്നം എന്ന നിലയിൽ അതിനെ കുറിച്ച് വ്യക്തമായ ധാരണ കുറവാണ്. അതിനാൽ നമുക്ക് ഇവിടെ ഇക്വിറ്റിയെ കുറിച്ച് പ്രതിപാദിയ്ക്കാം.

ഇക്വിറ്റി എന്നാൽ ഉടമസ്ഥാവകാശം

ഇക്വിറ്റി എന്നാൽ ഒരു സ്ഥാപനത്തിന്റെ ഉടമസ്ഥാവകാശത്തിന്റെ ഒരു പങ്ക് ആണ്. ഏതു സ്ഥാപനത്തിനും ഒന്നിൽ കൂടുതൽ ഷെയറുകൾ ഉണ്ടാകാം. ഇതിൽ ഒരു ഷെയറിനെ സ്ഥാപനത്തിന്റെ ഉടമസ്ഥാവകാശത്തിന്റെ ഒരു പങ്ക് ആയി കണക്കാക്കാം. ഉദാഹരണത്തിന് x എന്നും y എന്നും പേരുള്ള രണ്ട് പേർ ഒരു ലക്ഷത്തിന്റെ ഷെയർ ക്യാപിറ്റലുമായി ഒരു സ്ഥാപനം രജിസ്റ്റർ ചെയുന്നു. ഇതിൽ രണ്ട് പേരും 50,000 വീതം തങ്ങളുടെ ഓഹരിയായി നൽകുന്നു. ക്രമേണ സ്ഥാപനം അഭിവൃദ്ധിപ്പെട്ടപ്പോൾ ലാഭം ഷെയർ ക്യാപിറ്റലിനേക്കാൾ കൂടുതൽ ആകുന്നു.  ലാഭ തുക കൊണ്ട് മാത്രം സ്ഥാപനം കൂടുതൽ ബ്രാഞ്ചുകൾ തുടങ്ങുന്നു. ഈ സമയത്ത് z എന്ന പേരിൽ ഉള്ള ഒരു നിക്ഷേപകൻ സ്ഥാപനത്തിൽ നിക്ഷേപിയ്ക്കാൻ താല്പര്യം പ്രകടിപ്പിയ്ക്കുന്നു. x ഉം y ഉം ചേർന്ന് ഒരു വിദഗ്ധന്റെ സഹായത്തോടെ സ്ഥാപനത്തിന്റെ മൂല്യനിർണയം നടത്തുന്നു. ഇവിടെ അവർ സ്ഥാപനത്തിന്റെ സൽപ്പേർ, ഇക്കഴിഞ്ഞ വർഷങ്ങളിലെ അവരുടെ അദ്ധ്വാനം എന്നിവ കൂടി കണക്കിലെടുത്ത് മൂല്യം 1 കോടി എന്ന് നിശ്ചയിയ്ക്കുന്നു. ഇതനുസരിച്ച്‌ z 33 ലക്ഷം നിക്ഷേപിച്ച് പങ്കാളി ആകുന്നു. ഈ നിക്ഷേപ തുക സ്ഥാപനത്തിന്റെ വിപുലീകരണത്തിന് ഉപയോഗിയ്ക്കുകയോ x നും y യ്ക്കും തമ്മിൽ പങ്കിട്ടെടുക്കുകയോ ആവാം.

ഇതിൽ നിന്ന് മനസ്സിലാക്കേണ്ടത് എന്തെന്നാൽ തുടക്കത്തിൽ 1 ലക്ഷം ഉണ്ടായിരുന്ന ഷെയറിന്റെ മൂല്യം സ്ഥാപനം വികസിച്ചതിന് ശേഷം 1 കോടി ആയി. ഒരു പങ്കാളിയുടെ ഷെയർ അന്ന് 50,000 ആയിരുന്നുവെങ്കിൽ ഇന്നത് 33 ലക്ഷം ആയിരിയ്ക്കുന്നു.

ഷെയർ മാർക്കറ്റ് എത്രത്തോളം റിസ്കി ആണ്

ഷെയർ മാർക്കറ്റിൽ റിസ്ക് തീർച്ചയായും ഉണ്ട്. ഒരു സ്ഥാപനത്തിന്റെ പ്രകടനം അതിന്റെ ഓഹരി മൂല്യത്തിൽ പ്രതിഫലിയ്ക്കും. ഒരു സ്ഥാപനത്തിന്റെ ഓഹരിയ്ക്ക് നിക്ഷേപകരുടെ ഭാഗത്ത് നിന്ന് എത്രത്തോളം ആവശ്യം ഉയരുന്നു എന്നതും സ്ഥാപനത്തിന്റെ മൂല്യത്തെ ബാധിയ്ക്കും. ഒരു സ്ഥാപനത്തിൽ നിക്ഷേപം നടത്തുന്നതിന് മുൻപ് ആ സ്ഥാപനത്തിന്റെ ലാഭ സാധ്യത ഒരു നിക്ഷേപകൻ പരിശോധിയ്ക്കും. സ്ഥാപനത്തെ കുറിച്ചുള്ള ഒരു നല്ല വാർത്ത മതി ഓഹരിയുടെ മൂല്യം വർദ്ധിയ്ക്കാൻ.  മറിച്ച്‌ ഒരു മോശം ഘട്ടമോ ദുർഭരണമോ ഓഹരിയുടെ മൂല്യം കുത്തനെ താഴ്ത്തുകയും ചെയ്യും.

മുകളിൽ പറഞ്ഞത് പോലെ ഒരു സ്ഥാപനത്തിന്റെ ഉടമസ്ഥാവകാശത്തിന്റെ ഒരു പങ്ക് ആണ് ഇക്വിറ്റി. നിക്ഷേപ സമയത്ത് തുക കുറവായിരിയ്ക്കാം. സ്ഥാപനം വികസിയ്ക്കുകയും ഷെയർ മാർക്കറ്റിൽ ലിസ്റ്റ് ചെയ്യപ്പെടുകയും ചെയ്യുന്നതിനനുസരിച്ച്‌ അതിന് ഒന്നിലധികം ഓഹരി ഉടമകൾ ഉണ്ടാകാം. ഇത് സ്വാഭാവികമായും സ്ഥാപനത്തിന്റെ ഓഹരിയുടെ മൂല്യം വർദ്ധിപ്പിക്കുന്നു. ഓഹരി വിപണിയിൽ ലിസ്റ്റ് ചെയ്തിട്ടുള്ള സ്ഥാപനങ്ങളുടെ ഓഹരികൾ കയറി ഇറങ്ങി നില്ക്കുന്നത് അതിനാലാണ്.